NUUS: Febr 2013

Hier volg die nuus, geskryf deur Naude Kritzinger. Die Groot Trek het haarself in Februarie herhaal toe Erna Jo, digteres van Centurion, haar en haar huisraad na ‘n plaas in Mooiplaats verplaas het. Voortaan sal sy as MisPlaas bekend staan. Danksy die hulp van medespesielede Naude (die skrywer) en Michael (mede-inwoner van huis saam met sy vrou en her-opkomende sangeres Lieze Stassen) kon sy die reis suksesvol afhandel. Die grootste gevolg van hierdie skuif (buiten dat my kinners met donkies, eende en ‘n muil kan speel wanneer hulle gaan kuier), is dat sy nou dubbel so ver vanaf Mountain View bly. Die skrywer sug diep.

Op ander plekke in die stad gaan die Graad 1 leerder, Eduan Kritzinger (6), voort om die skares te verras met sy tennisvernuf en ‘n konsentrasie wat te goed is vir sy jare. Van hierdie spel sê Eduan: “Dit is lekker”. Hy en sy sy suster, Annika, het juis die afgelope Saterdag-oggend saam met die plaaslike gemeente se hoërskoolkinders speletjies gespeel.

 O ja, talent is nie skaar in hierdie familie nie. Alhoewel die kritici hom nog nie ontdek het nie, toon hulle pa (Naudé) ‘n geweldige talent in die skryfkuns. Aangesien wié jy ken belangriker is as wie jy is, het hy onlangs na die uithoeke van die provinsie gereis (Alberton!) vir die bywoning van ‘n Versvreugde en Woordgenot digterskuiergeleentheid. So geweldig was sy voorlesing van sy persoonlike ervaring in die gedig “Weskoppies” gewees dat die gasvrou se Man Smuts (familie van Jan?) sy luisterervaring verwoord het as: “netjies”.  

Seer sekerlik hoef die lesers dan ook nie te ver uit die veld geslaan word as ons hierby byvoeg dat hy dit selfs saam met sy vriendin (nie VRIENDIN, net vriendin) Lieze Stassen op die verhoog gewaag het nie. Die verrassing behoort eerder daar in te lê dat daar nie 'n verhoog was nie.

'n Laatberig lui dat 'n man in 'n afleweringsvoertuig (wat in hierdie land as 'n "bakkie" bekend staan) besoek aan die Kritzinger-ambasade afgelê het. Die onverskrokke man het egter nie met die deur in die huis geval nie, maar (aangesien hy vergeet het om sy bakkie uit te trek voordat hy die premisies betree) het wel met die muur in die tuin gebots. By ondertaande foto sien u die bewyse van sy daad.

 FOTOBYLAAG: Omgewing van die dekade

LITERêRE BYLAAG

:

Weskoppies

Dis Jerusalem dié,

'n stad met berge en mure om;

‘n kamer is 'n tempel

waar niemand skeef kyk nie.

Hier ken elkeen

die klank van baie stemme,

die dringendheid van gedagtes

wat niemand anders glo nie.

In Jerusalem

voer ons die vrese pille,

ons stap hand-oor-kop

saam met die werklikheid

van oortuigende delusies.