Ons het 'n engel in die huis gekry. Dis nou nie die een met die blinkwit rokkie en vlerkies waarvan ek praat nie. Dis die ander een. Die donkerbruin een met die kopdoek aan. Haar naam is Johanna Mtsweni en sy bly by ons. Die kinders is mal oor haar en ons ook.
Sy praat met E Zulu en sy eerste woorde wat hy gese het, het baie soos "indja" geklink - dit beteken eet. En dit doen hy ook.
Die res van ons doen dit ook ook. Eet, bedoel ek. Veral paaseiers, want P het besluit met die ding dat ons nou 2 salarisse het, mag sy 'n boks met 60! in vir ons koop. Niemand van ons was baie kwaad daaroor nie.
Nie eers A was kwaad nie, al lyk sy so bietjie soos die hanswors uit Steven King se "It" met haar spontane glimlag.
Hier is ’n grappie wat ek op opstandingsondag in die kerk vertel het (het hom nogal gekry op kerk se webwerf). Ek hak sommer aan ietsie van my preek se toepassing daarvan.
Gholfspelers is mos fanaties – niks sal hulle stuit om ’n potjie gholf te speel nie! Hoor hierdie een! ’n Gholfspeler, George, het uiteindelik by die huis aangekom. “George” het sy vrou ontsteld gesê: “Jy het belowe om 4-uur by die huis te wees! Kyk dis nou al 8-uur!” “Maar liefling, luister na my. Arme Fred het op die agste setperk dood neergeval!” “O dis verskriklik!” antwoord sy vrou. “Ja , dit was regtig sleg en swaar.” antwoord George, “Vir die res van die dag was dit “Slaan die bal, sleep vir Fred, slaan die bal, sleep vir Fred !”
· (2 redes om die grappie te vertel: Eerstens, dit is gewoonte in die kerk om grappies oor die dood op Paassondag te vertel! As simbool van God wat laaste gelag het! Tweede rede vir grappie vertel: ons maak nie erns met die opstanding nie, daarom sleep ons ’n dooie Jesus saam met ons soos George met sy dooie vriend, Fred, gemaak het....
· In ’n golfbaan is daar sandtraps, daar is rowwe-veld, daar is watergate. Dit maak alles die spel moeiliker. Nou, in sulke omstandighede, wat maak dit makliker – om ’n dooie iemand saam te sleep oor die rowweveld, of om Gary Player as caddy te hê wat saam met jou stap? Nie ’n moeilike vraag nie. Dit is wat die opstanding verander in ons lewensperspektief. In ons lewens is daar sand (dryfsand van finansies), daar is rowweveld, daar is watergate (waar jy weet jy moet dien, maar waar kry jy die krag vandaan?). As Jesus dood was, dan moet jy nog ’n dooie Jesus saam met jou oor hierdie rowweveld sleep. (Slaan en sleep, slaan en sleep...) Maar as jy besef Jesus lewe, weet jy Hy stap saam met jou, Hy help jou dra, Hy gee jou raad, Hy gee jou krag....
· Ons maak nie erns met die opstanding nie, daarom sleep ons ’n dooie Jesus saam met ons soos George met sy dooie vriend, Fred, gemaak het....
He 'n lekker lewendige tyd na paastyd!
Labels: golf, hanswors, johanna, paas
Gepraat nou al weer van Afrika. Kyk net watse wilde ongediertes kry mens in hierdie kontinent. En dis net as ons om die blok stap!
